இன்னொரு தங்கவேலு பெரிய மீசை வைத்திருப்பதால் அவருக்கு மீசை தங்கவேலு என்ற பெயர். ரெண்டு தங்கவேளுக்களும் எப்போதும் அக்னிநட்சத்திரம் கார்த்திக், பிரபு போல முறைத்துக்கொண்டே இருப்பார்கள். ஆனால் வேலையில் இருவருமே கெட்டிக்காரர்கள். முட்டை தங்கவேல் பெரிய டாக்டரிடம் அவ்வப்போது திட்டு வாங்கிக்கொண்டே இருப்பார். ஏனென்றால் பெரிய டாக்டர் சின்ன டாக்டராக இருந்தபோது, அவரையே விரட்டுவாராம் அதன் விளைவு அவ்வப்போது வெளிப்படும். காலை வேளைகளில் பெரிய டாக்டர் வரும் நேரம் கிட்டத்தட்ட ஒரு அரச சபை போலதான் காட்சியளிக்கும். டாக்டர் வந்தவுடன் இரண்டு தங்கவேளுக்களும் ஆஜர் ஆகி விடுவார்கள், மாதம் மும்மாரி பொழிகிறதா என்ற விஷயம் முதல் யார் வீட்டில் கத்திரிக்காய் குழம்பு என்பது வரை அனைத்தும் விவாதிக்கப்படும் இதில் விகடகவி யார் என்றால் என்னைப்போன்ற ஜூனியர் டாக்டர்கள்தான், அவ்வப்போது எதையாவது சொல்லி கிச்சு கிச்சு மூட்டுவோம். பெரிய டாக்டரிடம் நக்கல் நையாண்டிகளுக்கு தீனி போடுவது பெரும்பாலும் முட்டை தங்கவேலு அல்லது ஜூனியர் டாக்டர்கள்தான்.